السبب الأكيد في زيادة سعر تحويل الرصيد

السبب الأكيد في زيادة سعر تحويل الرصيد



من على صفيح ساخر. كتابات ساخرة بقلم راشد الطيب محمد الأمين في 2 ديسمبر، 2011‏ في 10:15 صباحاً‏ ·‏

وفي
غمرة هذه الموجة المجنونة من الارتفاع الغير الطبيعي للأسعار مازحت احد
اصدقائي قائلا ( قالو الرصيد حيغلى ، تاني تشتري كرت ابو خمسة تلقى فيهو
رصيد بي تلاتة بس ) و قد كانت من باب الدعابة لكن الظاهر بلدنا دي ما بلد
مداعبات ، فهاهم ناس شركة زين يتحفوننا مع صباحات الله برسالة ليخطروننا
بأن تحويل الرصيد رسومه زادت 100 % و العاجبو عاجبو والماعاجبو البلد قيها
نيلين ومية الف حيطة .. انتابتني حالة من الغضب و الزعل و حرقني عديل إلا
أنني استهديت بالله وفكرت فيها يمين و شمال وقلبت فوق تحت فوجدت ان ناس زين
عندهم حق ولديهم من الأسباب ما يجعلهم يقسمو الرصيد المحول معاك النص النص
.. نص ليهم ونص ليك مش يشيلو 120 قرش بس .. و سنورد لكم في المقال هذا 10
سبب لهذه الزيادة المية في المية :

1- هبالة الشعب السوداني فبرغم
رخصة اشركات الأخرى مثل سوداني و أريبا و للعلم فإن الإتصال من أريبا للزين
أرخص من ما تتصل من زين لي زين إلا أن الكديس بريد خناقو و كلنا شايلين
شرايح زين و العجب العجاب الواحد لما يجي يحب يطلع الزين و يضرب للواحدة
عليك الله دخلي شريحتك الاريبا سريع سريع عشان ماعندي رصيد و يقعد يحبحب
ساعتين بي ألفين جنيه ولما يجي يسب لي صاحبو المحضنو حنفية وموقفو ساعتين
في السوق العربي تلقا منزل رصيد زين بي تلاتة الف ويكملو في 7 دقائق كلها
وين انت يا بشر و انا في الكبري ..

2- إرتفاع سعر الدولار مما أثر
على حكاية التحويل لانو الظاهر و الله أعلم إنو لما الزول يحول ناس الشركة
بستلمو الألف جنيه بتاعك بعداك بحولو دولار بعداك برجعو جنيه تاني عشان
يجيك ومن المعلوم لمن يفقه في تجارة العملات ان سعر البيع لا يساوي سعر
الشراء وانو الدولار رافع سعرو شديد الأيامات دي .

3- في هذه البلد
انت لما تعمل اي شي ما بتعمل لي نفسك بس وانما لازم تدي هذا الوطن العفن
حقو برضو فالواحد عندما يشتري عربية فهو يدفع جمارك مية في المية ليشتري
للحكومة برضو عربية فلا يصح انو انا التافه دة اركب عربة وفي ولد وزير عمرو
تلاتة سنة و ما سايق معناها المفروض يا اما لا انا اسوق لا هو يسوق او
اشتري ليه معاي عربية وبنفس المستوى وعلى ذات النسق لابد أن الجماعة ديل
يتكلمو معانا برضو بي رصيدنا .

4- الفهم الخاطئ للحديث الشريف ( حب
لأخيك ما تحب لنفسك ) فالظاهر ان أحد شيوخ الزمن دة بتاعين الخروف بالأقساط
ديل قد فسر لهم هذا الحديث بمعني حب لأخيك و حب لنفسك أي أنك عندما تشتري
رصيد عشان تحب بيه أي ( تحب لنفسك ) لابد أن تتبرع برضو بجزء من الرصيد لكي
يحب به أخيك فتكون قد ( أحببت لأخيك ) برضو و يتحقق المطلوب وهو ان تحب
أخيك كما تحب لنفسك ، واخيك المقصود دة هو مالك شركة زين البشيل المية
جنيه الفوق دي .

5- إعلاء قيم الوطنية و تعزيز روح الإنتماء و حب
الوطن بين أفراد هذا الجيل الصاعد ، فبثلما الواحد بنزل رصيد عشان يضرب لي
أخوه و أمو و أبوه و صاحبو وحبيبتو لابد أن يضرب للوطن تلفون برضو لأن
الوطن اعز و اغلى واهم من الام و الخ و الصديق و الحبيبة و بما ان الوطن ما
عندو رقم تلفون عشان تضرب ليه فيهو وتوريه مقدار حبك وعشقك له ولترابه
الغالي النفيس كان لابد أن ندي الوطن قروش المكالمات الكنا حنضربا ليهو
كاش داون يعني بدل ما كنت من كل الف جنيه تضرب تحب في الوطن دقيقة احسن تدي
الوطن حق الدقيقة دي كاش وهو حيقدر مشاعرك النبيلة تجاهو .

6- عملا
بالقاعدة الشرعية ( دفع الضرر مقدم على جلب المنفعة ) ومن المعلوم ان
المنفعة التي قد تأتي من الرصيد هي ان تتكلم مع امك ولا ابوك ولا تصل واحد
من أرحامك بالتلفون ولا تستخدمو في أي من الأغراض النبيلة الأخرى ، أما
الضرر المترتب عليه إنك ممكن تغش بيه واحدة من بنات الناس او تتكلم مع واحد
من اصحبك وتسمعو كلام فارغ ولايجوز فالضرر هنا بين وواضح و المنفعة ايضا
موجودة ولكن كما أسلفنا القول فإن دفع الضرر مقدم على جلب المنفعة .

7-
التطبيق الحقيقي للشريعة الإسلامية ومكافحة الخلط والإختلاط فبعد انفصال
الجنوب وكما نعلم جميعا و كما قالت الفنانة الكبيرة ( الشريعة جات يا )
ونسبة لعدم وجود بارات لتقفيلها فقد أثر القائمون على تطبيقها ان تطبق
بمكافحة الإختلاط و الحنك والحنحنة الفارغة وهي من موبقات ومهلكات هذا
الزمان .. و كما تقوم معظم الدول المتقدمة بمكافحة التدخين عن طريق رفع
اسعاره وزيادة الضرائب المفروضة عليه تقوم دولتنا العزيزة و المتقدمة أكتر
منهم بمكافحة الخلط و الحنحنة عن طريق زيادة الاسعار والضرائب المفروضة
عليها .

8- إرتفاع سعر طلب الفول من الفين لي تلاتة الف ونص مما قلل
من تناول الشعب السوداني للفول و تقليل النوم الناتج عن تناوله نهارا مما
أدى إلى عدم قدرة المواطن السوداني على السهر ليلا نتيجة للإرهاق بالنهار
وعدم اخذ اي قسط من الراحة مما ادى الا نقصان الناس البتكلمو بالتلفون
بالليل مما ادى الا تقليل الارباح التي تحصل عليها الشركة و التي تم
تعويضها عن طريق رفع قيمة التحويل .

9-الثورات العربية في تونس
وليبيا و مصر و اليمن و سوريا أدت إلى تقليل ارباح فروع شركة زين بهذه
البلدان و بما أنو الشركة لازم ماتخسر معناها الناس دي تشتغل بي نظام ( كسر
دة في جبر دة ) و نحن نشارك في تعويض هذه الخسائر من مالنا الخاص .

10-
بلا سبب كدة بس زادت .. هي يعني بقت على زيادة التحويل ما اي ش في البلد
دي زاد رجالة وحمرة عين ساي ، إشمعنى دة الحيكون داير سبب عاشر منطقي ..

إخوتي
في الإيمان أصدقكم القول أنني و بعد التفكير وبعد أن هداني تاملي وتفكري
وتدبري لكل هذه الأسباب المنطقية ونص وخمسة لزيادة رسوم التحويل اضررت ان
استغفر الله و ان ابعث من هذا المنبر برسالة إلى القائمين على شركة زين
إنهم لازم يعفو لي لأنني أسأت بهم الظنون و فكرت حين غرة كدة انو ممكن
يكونو زادوها ساي بلا سبب كدة .. عليكم الله اعفو لي و وفقكم الله لخدمة
البلاد و العباد و القيام بشئون الاتصالات في هذه البلاد خير قيام و جزاكم
الله حيرا وسدد خطاكم

كتابات اخوي الدايما اقول ليهو انو مسطول بالجد.